Get more stuff like this
Subscribe to our mailing list and get interesting stuff and updates to your email inbox.
Thank you for subscribing.
Something went wrong.
Sentyabrın 28-də Respublika Veteranlar Təşkilatı (RVT) Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Yeniyetmə, gənc və universitet tələbələri arasında vətənpərvərliyin təbliği ilə bağlı görüşlərin keçirilməsi” layihəsi çərçivəsində ilk tədbir keçirib.
AZƏRTAC xəbər verir ki, tədbirin əsas məqsədi yeniyetmə və gənclər arasında vətənpərvərliyin təbliğ edilməsi, vətən yolunda canından keçmiş və əvəzsiz xidmətləri olan şəxslərin tanıdılması, gənc nəslə onların həyat və fəaliyyətlərinin örnək olaraq təbliğ edilməsidir.
Azərbaycanın dövlət himninin səslənməsi ilə başlayan tədbirdə şəhidlərin xatirəsi bir dəqiqəlik sükütla yad edilib.
Tədbirdə RVT-nin sədr müavini, polkovnik Cəlil Xəlilov lahiyə barəsində, eləcə də gənc nəslin vətənpərvərlik ruhunda tərbiyə olunmasında təşkilatın fəaliyyəti, keçirilən tədbirlər haqqında məlumat verib, bu sahədə veteranların üzərinə düşən vəzifələrdən danışıb.
C.Xəlilov deyib: “Bu gün biz vətənpərvərliyin təbliğ olunması istiqamətində həyata keçirilən layihənin ilk tədbirinə toplaşmışıq. Şəhidlərimizə həsr olunmuş belə layihələr hər bir azərbaycanlı üçün çox böyük əhəmiyyət kəsb edir. Şəhidlər Vətəni yaşatmaq naminə qanlı döyüşlərə atılaraq babalarımızın bizlərə əmanəti olan bu doğma yurdu canları, qanları bahasına müdafiə ediblər. Onlar düşmənə ağır zərbələr vuraraq Azərbaycanın qəhrəmanlıq, mərdlik tarixinə yeni, silinməz səhifələr əlavə ediblər. Hər birimiz onlara olan borcumuzu yerinə yetirməli olduğumuzu bir an da unutmamalıyıq. Xüsusilə gənclər onların hər birinin həyat yolu və döyüş zamanı göstərdikləri qəhrəmanlıq nümunələri barədə məlumatlandırılmalı, Vətəni, xalqı müdafiə etməkdə hər cür fədakarlığa hazır olmalıdırlar.
Təşkilat belə tədbirləri yalnız layihələrlə əlaqədar deyil, il ərzində müvafiq Tədbirlər Planı əsasında müntəzəm olaraq keçirir. Bu çərçivədə ölkənin dörd regionunda əsasən gənclərin iştirakı ilə silsilə tədbirlər keçirilib. Bu lahiyyəyə əsasən Qarabağ, eyni zamanda Aprel döyüşlərində qəhrəmancasına şəhid olmuş gənclərin həyat və döyüş yolundan söhbət açılacaq. Layihə çərçivəsində görüşlərimiz davam edəcək, ali və orta məktəblərdə belə tədbirlər keçiriləcək. Bundan əlavə şəhidlərimizə həsr olunmuş bir kitabça da hazırlamışıq”.
Tədbirdə Respublika Veteranlar Təşkilatının əməkdaşları çıxış edərək şəhidlərimizin xatirəsinin Azərbaycan xalqının yaddaşında daim yaşayacağını bildiriblər. Qeyd edilib ki, qəhrəmanlarımızın həyat və döyüş yolunu təbliği yeniyetmə və gənclərimizin maariflənməsi baxımından böyük əhəmiyyət kəsb edir.
Sonda iştirakçılara qəhrəman şəhidlərimizə həsr edilmiş maarifləndirici bukletlər paylanıb, xatirə şəkili çəkilib.
Mənbə : Azərtac
