Yapon qəzetləri həmyerlimizin “Global Hataraku Gunma” layihəsində fəal iştirakından yazır

Yaponiyanın Qunma prefekturasında nəşr olunan “Cyoumo” və “Qunma iqtisadiyyatı” qəzetləri həmyerlimizin “Global Hataraku Gunma” (“Qunmada qlobal iş”) layihəsində fəal iştirakından yazır.

AZƏRTAC xəbər verir ki, məqalələrdə əvvəlcə layihənin təşkilatçısı, Qunma Universitetinin professoru, Tələbələrə dəstək təşkilatının sədri xanım Mequmi Yuki layihənin məqsədi barədə ətraflı məlumat verir. Bildirir ki, əsas məqsəd prefekturanın ərazisində yerləşən ali məktəblərdə təhsil alan əcnəbi tələbələrin yapon dili səviyyəsini yüksəltməkdir. Bu, həmin tələbələrin gələcəkdə Yaponiyada qalaraq, buradakı şirkətlərdə çalışmaq imkanını xeyli artırır. Layihədə Qunma Universiteti ilə yanaşı, yerli şirkətlər də iştirak edirlər ki, bu da tələbələrə ilin müəyyən həftələrində həmin şirkətlərdə təcrübə keçmək imkanı qazandırır. Layihədə iştirak üçün əsasən intizamı, təhsil səviyyəsi və fəallığı ilə fərqlənən əcnəbi tələbələr seçilirlər. Belə tələbələr Yaponiya dövləti tərəfindən dəstəklənməklə yanaşı, gələcək karyeralarını qurmaq üçün vacib şans əldə edirlər. Qunma prefekturasında iş taparaq, arzularını həyata keçirirlər.

Cari ildə təşkil edilən layihədə iştirak üçün 11 tələbənin seçildiyini bildirən M.Yuki qeyd edir ki, ilk dəfə burada Azərbaycandan olan tələbə də iştirak edib. Qunma Universitetinin magistri Namiq Xəlilin layihədə fəal iştirakını vurğulayan professor onun Azərbaycan barədə təqdimatının iştirakçılar tərəfindən maraqla qarşılandığını bildirib. Qeyd edib ki, həmin təqdimat həm layihənin təşkilatçılarının, həm də iştirakçıların böyük marağına səbəb olub. Belə vətənpərvər tələbələrin layihədə iştirakı, onlar tərəfindən yapon dilinin dərindən öyrənilməsi bu tələbələrin təmsil etdikləri ölkələrlə Yaponiya arasında əlaqələrin inkişafına mühüm töhfələr verəcəyini deməyə əsas verir. Bu tələbələr gələcəkdə həm Yaponiyada, həm də öz doğma vətənlərində fəaliyyət göstərərək hər iki ölkəyə xidmət edəcəklər.

Məqalələrdə ümumiyyətlə son vaxtlar əcnəbi gənclər arasında Yaponiyada təhsilə artan maraq, burada əcnəbi tələbələrin sayının artması, peşəkar səviyyəyə çatmaq üçün yapon dilinin öyrənilməsi barədə məlumatlar da öz əksini tapıb.

MƏNBƏ:AZƏRTAC