Truskavetsdə Müslüm Maqomayevin xatirəsinə beynəlxalq müsabiqə təşkil ediləcək.

Ukraynanın Truskavets şəhərində noyabrın 15-18-də dünya şöhrətli müğənni və bəstəkar, SSRİ və Azərbaycanın Xalq artisti Müslüm Maqomayevin xatirəsinə həsr olunan I Beynəlxalq Vokalistlər Müsabiqəsi keçiriləcək.
AZƏRTAC xəbər verir ki, bununla bağlı təşkil olunan mətbuat konfransında müsabiqədə 15 vokalistin iştirak edəcəyi açıqlanıb.
Müslüm Maqomayev adına Mədəniyyət Mərkəzinin rəhbəri, Ukraynanın Xalq artisti Qurban Abbasov bildirib ki, bu cür müsabiqələrin keçirilməsi yeni istedadların üzə çıxarılması üçün önəmlidir. Müslüm Maqomayevin sənəti, onun istedadı sərhəd tanımadığı üçün onun işığına yığışanlar qürur hissi ilə beynəlxalq tədbirlərdə iştirak edirlər.
Truskavets şəhərinin meri Andrey Kulçinski deyib ki, M.Maqomayev təkcə Azərbaycanın deyil, bütün dünyanın sevdiyi sənətkardır. Merin sözlərinə görə, Azərbaycan ilə Ukrayna arasında bütün sahələrdə olduğu kimi, mədəniyyət sahəsində də birgə uğurlu layihələr həyata keçirilir.
Azərbaycanın Ukraynadakı səfirliyinin attaşesi Təbriz Qarayev bildirib ki, səfirlik hər zaman mədəni layihələrə dəstək göstərib. Bildiyiniz ki, bu yaxınlarda səfirliyin təşkilatçılığı ilə Kiyevdə Müslüm Maqomayev adına park açıldı və orada möhtəşəm heykəli qoyuldu. Yaxın gələcəkdə Dneprdə də onun adına park və Mədəniyyət Mərkəzinin açılması nəzərdə tutulur. Onun sözlərinə görə, Azərbaycan mədəniyyətinin Ukraynada tanıdılması üçün diaspor təşkilatlarımız da böyük işlər görürlər.
Tədbirdə çıxış edənlər Ukraynanın Xalq artistləri Raisa Nedaşkovskaya, Lyudmila Bojka, Oleksandr Dyaçenko, Olqa Kaminska, Azərbaycanın diaspor fəalları Eduard Bağırov, Vidadi İsrafilov və Famil Camal Müslüm Maqomayev yaradıcılığından, bu cür müsabiqələrin keçirilməsinin əhəmiyyətindən danışıblar.
Qeyd edək ki, beynəlxalq müsabiqənin keçirilməsinə Ukraynanın Mədəniyyət Nazirliyi, Azərbaycanın Diasporla İş üzrə Dövlət Komitəsi, səfirliyimiz, Truskavets meriyası, Müslüm Maqomayev adına Mədəniyyət Mərkəzi və digər təşkilatlar dəstək verirlər.

Mənbə : Azərtac

BIR CAVAB BURAXIN

Rəyinizi daxil edin
Adınızı daxil edin