“Sonuncu Əsr” MGK-nın növbəti tədbiri keçirildi.

Keçən ilini böyük bir layihə ilə sonlandıran “Sonuncu əsr” dekabrın 31-i “Hekayə yarışması-2” nin finalçılarını açıqlayaraq yeni ilə qələbə ilə girdi. Bu qələbə nə yüzə yaxın hekayə içindən hekayələri seçilən finalçıların idi, nə də layihənin əsas hissəsini başa vurmuş Sonuncu əsr MGK-nın. Uğur qocaman ədəbiyyatımıza öz töhfələrini vermiş , ilk addımlarını atmış Azərbaycan gəncliyinindir. 17 fevral 2019-cu ildə bu yarışmanın bağlanış mərasimi həyata keçirildi. Tədbirdə münsiflər heyəti tərəfindən yüksək balla qiymətləndirilmiş 10 hekayə müəllifi sertifikatlarla təltif olundu. Hekayələrinin bir toplu halında çap olunaraq oxuculara təqdim olunması isə yazarlarımızın hədiyyəsi oldu, bir yazar üçün əsərlərinin oxunmasından, çatdırmaq istədiyi düşüncə və duyğuların ünvanına çatmasından daha gözəl nə ola bilər ki deyə düşünən “Sonuncu əsr”çilərin təklifi hekayə müəllifləri tərəfindən sevinclə qarşılandı. Kitabın önümüzdəki aylarda təqdim olunması planlaşdırılır. Kitabda həmçinin onluqdan əlavə yadda qalan və seçilən üç hekayənin də çap olunması nəzərdə tutulmuşdur. Onu da qeyd edək ki, birinci yerə Sevinc İbadova “Məni gələcək gözləyir”, ikinci yerə Firəngiz Quliyeva “Once upon a time”, üçüncü yerə Hafiz Abdullazadə “Yoluxucu davranışlar” adlı hekayələri ilə layiq görülmüşlər.
“Sonuncu əsr” dərgisinin tamamilə yeni formatda aprel ayından yenidən öz oxucularına çatdırılacağı və iki ay fasilə ilə yayımlanacağı xəbəri günün sürprizləri sırasında idi. Dərgi fəaliyyətinin yeni dönəminə elektron olaraq başlayacaq.
Tədbirdə gündəmi müxtəlif aspektlərdən izləyəcək türkman.info saytının fəaliyyətə başlayacağı xəbəri çatdırıldı. Saytda siyasət, iqtisadiyyat, mədəniyyət və s. bölmələrdə yeni məlumatlar, müsahibələr yer alacaqdır. Həmçinin Türkoloji Araşdırmalar Mərkəzinin üzvləri öz aktiv fəaliyyətlərinə görə sertifikatla təltif olundular. Mərkəzin araşdırmaçılarının yazılarını sonuncuesr.com təhsil portalından oxuya bilərsiniz.

BIR CAVAB BURAXIN

Rəyinizi daxil edin
Adınızı daxil edin