Sentyabrın 28-də Azərbaycan İlahiyyat İnstitutunda (Aİİ) “Gəncliyin fəlsəfəsi” mövzusunda seminar keçirilib.

Aİİ-dən AZƏRTAC-a bildirilib ki, tədbirdə bu ali təhsil ocağının rektoru, ilahiyyat üzrə fəlsəfə doktoru Ceyhun Məmmədov dövlət-din siyasətin əsasının ümummilli lider Heydər Əliyev tərəfindən qoyulduğunu, hazırda isə Prezident İlham Əliyevin uğurla davam etdirdiyini diqqətə çatdırıb. O, ölkədə mövcud sağlam din münasibətlərinin, yüksək mənəvi mühitin qorunub saxlanılmasında institutun üzərinə düşən vəzifələrindən bəhs edib, dövlətin gənclər siyasətinin əsas istiqamətləri, gənclərin mənəvi-əxlaqi tərbiyəsi və mədəni həyatda iştirakı məsələlərinə toxunub.

C.Məmmədov gəncliyin cəmiyyətin aparıcı qüvvəsi olduğunu, inkişafın yalnız yüksək elm, təhsil, qabiliyyət və bacarıqla mümkün olduğunu vurğulayıb və gəncləri hər bir sahədə fəal iştiraka səsləyib.

Sonra Azərbaycan Milli Elmlər Akademiyasının (AMEA) müxbir üzvü, fəlsəfə elmləri doktoru Könül Bünyadzadənin “Gəncliyin fəlsəfəsi” mövzusunda məruzəsi dinlənilib. O, məruzəsində gəncliyin qurulacaq insan abidəsinin postamentini qiymətləndirən, möhkəmləndirən və üzərində ucaldılacaq abidənin miqyasını təyin edən mərhələ olduğunu bildirib.

Məruzəçi tarixdə izi qalan, gənc yaşına baxmayaraq müdrikliyi ilə bəşəriyyətə, millətinə nümunə, lider, hətta xilaskar ola bilən gənclərin şəxsiyyətini təhlil edib. Gəncliyin əhəmiyyətli tərəfinin, hətta ən böyük assosiasiyasının cəsarət, hünər olduğunu deyən alim müzakirə zamanı gənc sərkərdələrdən də danışıb, onların simasında qılınc və qələmin kamil tandemini göstərməyə çalışıb. “Tarixin istənilən kəsiyində dünya mənzərəsinə baxanda ön planda həmişə gəncliyi görmək mümkündür. Yeni ideyalar irəli sürən, cəsarətli addımlar atan, savaşlarda göz qırpmadan canını fəda edən, eyni zamanda, cəmiyyətin sabitliyini kökündən sarsıda bilən hərəkatlar, təşkilatlar yaradan, müstəqil seçim adı ilə fanatizmə qurban gedə bilənlər də məhz gənclərdir”, – deyə K.Bünyadzadə diqqətə çatdırıb.

Seminar gənclərin maddiyyat və əbədiyyət, qılınc və qələm arasında etdikləri seçim, gənclik və cəmiyyət, gəncliyin fateh ruhu, onun qorxuları, sevgisi, yaradıcılıq axtarışları kimi əlaqəli konteksdə müzakirələrlə davam edib.

MƏNBƏ:AZƏRTAC

BIR CAVAB BURAXIN

Rəyinizi daxil edin
Adınızı daxil edin