Ölüm var ki, həyat qədər dəyərli…

(Milli Qəhrəman Mübariz İbrahimovun əziz xatirəsinə).

    Görəsən doğrudan da ölüm həyatı, gözəllikləri, yaşamı, sevgini əlimizdən alan məhfumdur. Ölüm sadəcə insanın doğulduğu andan etibarən bəlli bir həyat yaşayıb sonda yox olmasımıdır? Sonda həqiqətən də ölüm qələbə çalır?

Doğulduğumuz gündən keçici olaraq müxtəlif oyunlar oynayırıq ki, bu oyunlar həyat adı verilən bir tamaşanı yaradır. Və bu tamaşanın sonunda qələbə ölümün olacaq. Gözümüzü açdığımız gündən doğum kimi ölüm də bizim taleyimizə yazılır və ovunu tutmaqdan ötrü sadəcə bizimlə biraz oynayır.

Ölüm bizi sevdiklərimizdən, həyatdan, yaşamdan mı ayırır həqiqətən də, yoxsa bizə yenidən yaşamaq üçün göndərilən bir nemətdirmi? Kimiləri üçün ölüm həqiqətən də həyatın sona çatmasıdı. Bəs bütün ölümlər eynidirmi?! Bəziləri böyük bir villada, hər tərəfi güllər, çiçəklərlə, bahalı əşyalarla bəzədilmiş evlərdə həyatını itirir, bəziləri bir parça çörək üçün Vətəndən uzaq qərib diyarlarda gözlərini əbədi olaraq həyata yumur, kimiləri isə sonsuz bir amal üçün dünyaya gələr və bu əqidə ilə yaşayır, yaşamları boyu bu əqidənin həyata keçməsinə çalışırlar. Bu insanlar ədəbiyyatı əldə edirlər və ölüm onların bizə yenidən qayıtmasına səbəb olur. Lakin bu dəfə onlar bir əbədiyyat günəşi kimi qəlbimizə nur saçırlar, qaranlıq gecədə bizə işığı göstərir, daşlaşmış qəlblərimizə sevginin nə olduğunu anladırlar. Sonsuz yurd, torpaq sevgisi onu bu amal uğrunda yenidən həyat tapmağa məcbur etdi. -Mübariz Ibrahimov. Insanlar vardır ki, gözlərini həyata yummaq  onlar üçün ölüm deməkdi, bəs Mübariz Ibrahimov necə həqiqətən mi ölüm onu öz caynağına keçirə bildi, bizdən aldı?!Yox o ölmədi, ölümlə yenidən həyat qazandı, bizim yaşadığımızdan həyatdan daha gözəl  və daha şərəfli bir həyat , daha qururlu bir ad, bir yaşam Şəhidlik adını qazandı Mübariz Ibrahimov. Şəhidlik! Ölümün gözünə qorxmadan baxmaq, bir an belə tərəddüd etmədən Vətən, millət yolunda canını verməkdir. Mübariz Ibrahimov! O, bu millətə unutduğu Kürşad cəsarətini, Koroğlu gücünü qaytardı. 22 yaşlı gənc qəhrəman düşünmədən mənim eşqim, tək sevgilim vətənim və millətimdir deyərək düşmən üzərinə qorxmadan yürüyərək Türk oğlunun nəyə qadir olduğunu göstərdi. Şəhidlik Mübarizin alın yazısı idi. Hər bir Azərbaycan gənci kimi o da Qarabağda, Xocalıda yaşanan dəhşətlər haqqında eşidərək böyüyüb. Mübariz uşaq yaşlarından millətinin, vətəninin qisasını alacağını deyərmiş. Qəhrəman dediyini də edir. 2010-cu il iyunun 19-da illərdən bəri düşündüyünü yerinə yetirir. Gecə radələrində Tərtər istiqamətində düşmən işğalı altında olan Çaylı kəndindəki erməni qərargahına girmək üçün bir kilometrlik minalanmış yolu təkbaşına keçir və 5 saat bir orduyla döyüşür. Düşmənin öz silahından özlərinə qarşı istifadə edərək, düşmənin ağlasığmaz sayda əsgərini məhv edib. Gecənin qaranlğında nə baş verdiyini anlamayan düşmən ordusu elə zənn edir ki, Azərbaycanın böyük bir ordusu onların üstünə gəlib. Mənfur düşmən o qədər qorxuya düşür ki, hətta köməyə əlavə yardım da çağırır. Qəhrəman səhərə yaxın qeyri-bərabər döyüşdə vətəni uğrunda Şəhid düşür. Tanrının biz insanlara bəxş etdiyi tək və yeganə ən böyük rütbəyə-Şəhidlik rütbəsinə ucalır. Bəli, Mübariz ən çətin anlarında vətənimizin üzərinə saçılan “qış günəşi” oldu.

Yurdunun, millətinin qəhrəman, adı kimi mübariz oğlu sən ölmədin!Sən torpağa deyildə millətinin qəlbinə gömüldün, könülləri bəzəyən vətən şərqilərinə çevrilib sevilə-sevilə dillər əzbəri olursan!

Rahat uyu Şəhidim! Sən uyu, indi bizim növbəmizdir, sizin al-qanınızla sulanmış bu torpaqları canımız, göz bəbəyimiz qədər qorumaq indi bizim borcumuzdur!