Gənc yazar Novruz Novruzovla müsahibə

Müsahib Novruz Novruzov “Sonuncu Əsr Hekayələri” kitabında yerləşən – “Ölüm fısıltısı” hekayəsinin müəllifi

• İlk dəfə nə vaxt hekayə yazmaq fikrinə düşdünüz? Sizi nə ilhamlandırdı?

İlk dəfə hekayə yox, bir dəfəlik roman yazmaq fikri ilə başlamışdım. Uşaq vaxtından filmləri çox sevmişəm, xüsusiylədə qorxulu filmləri. Vampirlər, qurdadamlar, qulyabanılar, gəlmələr haqqında filmlərin çoxu mənim favoritimdir. Məktəb vaxtı ilk dəfə Twilight adlı məhşur vampir kinosunu izləmişdim və kinoya az qala vurulmuşdum. Sonradan bunun bir kitab əsasında çəkildiyini öyrəndim. O vaxtda qədər kitab anlayışı mənim üçün sadəcə kitabxanaların rəflərində yığılıb qalan klassik janrlı kitablar idi ki, bunları oxumaq çətin və bir az da maraqsız idi mənim üçün. Amma sonra bu filmin bir kitab əsasında çəkildiyini öyrənəndə fikrim dəyişdi və araşdırdıqca az qala doxsan faiz filmin məhz kitab əsasında çəkildiyini öyrəndim. Və özlüyümdə bu filmin beşinci seriyasını gözləyərkən əgər xoşuma gəlməsə kitabın ardını özümün yazacağımı dedim. Filmə baxdım və çox xoşuma gəldi, amma içimdə yazmaq istəyi sönmədi.

Bir gün ən yaxın dostlarımdan birinin kefsiz olduğunu gördüm. Səbəbini soruşanda dostlarından birinin intihar etmək fikrində olduğunu və buna görə pis olduğunu dedi. Sonra bir yerdə görüşüb onu bu fikrindən daşındırmaq qərarına gəldik və həmin oğlanla görüşdük. Fikrində ciddi idi və qətiyyətlə özünü öldürəcəyini deyirdi, amma nəsə öldürmədi. İndi fikirləşəndə bunun sadəcə yeniyetmələrin qəribə davranışları, diqqətləri öz üzərimizə çəkməkdən başqa bir şey olduğunu fikirləşmirəm. Hətta güləməli gəlir. Nəysə dostum bundan sonra bunun haqqında bir kitab yazmaq fikrində olduğunu deyəndə mənim içimdə həmin o yazmaq istəyi yenidən alovlandı. Düzdü dostum sonra yazmadı, amma mən buraxa bilmədim. Həmin əhvalat haqqında olmasada ondan daha maraqlı bir vampir hekayəsi yazdım.

• “Ölüm fısıltısı”- fərqli baxış sərgiləyən hekayədir. Baş qəhraman- Ölüm. Bu ideya sizdə necə yarandı?

İlk olaraq hekayənin adı mənim çox xoşuma gəlmişdi. Bu ad içində şeytan olan bir uşağın onu qaçıranların başına açdığı dəhşətli oyun haqqında olan eyni adlı filmdən gəlir. Amma hekayəni əsasən Marcus Zusak-ın Kitab Oğrusu adlı kitabı əsasında çəkilmiş filmdən təsirlənib yazmışam. Orda belə bir səhnə var: İkinci dünya müharibəsi zamanı Ölüm Almaniyanın üstündən uçur və aşağıda bombardman olmağına baxmayaraq azadlığa çıxıb sevinən yəhudini görür. Buna baxıb məndə ölümün dilindən bir hekayə yazmağı fikirləşdim.

• Yazarı- Novruz Novruzov üçün, hekayənin fəlsəfəsi nədir?

Əslində hekayə bir az pessimist xarakterlidir. Yəni insanların heç vaxt dəyişməyəcəyini deyir, amma məncə belə deyil. Hələdə ümid var sadəcə öz doğru bildiyimiz yanlışlarla dünyanı dəyişməyə çalışmamalığıyq. Hekayədə ölümün bunu etdiyini görürük və nəticələr çox dəhşətli olur.

• Əslində bəşəriyyətin yeganə həqiqəti- “insan oğlunun” dəyişməyəcəyi açıq-aşkar göstərilir hekayədə. Bu haqda fikirləriniz maraqlıdır.

Bəli. Dəyişən sadəcə ətrafımız və fiziki aləmdir. Mən hətta öldürmə ehtimalı daha çox olan silahların yaradılmasının insan sayına olan nisbətinnin də düz mütanəsaib olduğunu düşünürəm. Yəni daha güclü silahlar yaratsaqda insan sayı ona görə artır. Məncə heç vaxt yoxa çıxmayacağıq. Ən azı minlərlə ildir bunu etməyə çalışdığımıza baxsaq bunun doğru fikir olduğunu görə bilərik.

• Yazının başqa bir maraqlı yanı da odur ki, insan gözündə həmişə pis olan, iblisin belə mərhəməti var- fikrimcə, bu paradoksla, siz xarici görünüşün aldadıcı olduğunu bir daha qeyd edirsiniz. Və hər şeyin gəlbdə gizləndiyini sübut etmək istəyirsiniz. Doğrudur mu? Fikriniz maraqlıdır

Yox əslində. Yəqin ki belə düşünməyinizin səbəbi ölümdən qorxmağınızdır. Çox insan ölümdən qorxur, amma hekayədəki ölüm iblis deyil. Hətta pis bir varlıq belə deyil. Əslində mən hekayəni ölüm mələyinin dilindən yazmışam. Mənə elə gəlirki onda bizim hiss etdiyimiz hisslər yoxdur, qaldıki onun mərhəmətinə, onun özünün də dediyi o insanlar arasında çox qaldığı üçün belə hiss etdiyini deyir.

Müsahibəni hazırladı-“Sonuncu Əsr” Jurnalistika bölməsinin rəhbəri,jurnalist Aysel Qarayeva