Gənc Yazar Murad Ramazanovla müsahibə

• Müsahib Murad Ramazanov “Sonuncu Əsr Hekayələri” kitabında yerləşən – “Qırmızı və Mavi” hekayəsinin müəllifi

• İlk dəfə nə vaxt hekayə yazmaq fikrinə düşdünüz? Sizi nə ilhamlandırdı?

İncəsənətə və xüsusən də ədəbiyyata sevgim hər zaman çox olub. Çoxlu sayda əsərlər oxuduqca insanda qəribəşəkildə yazmaq sevgisi yaranır çünki daxildə fərqli sujetlər meydana gəlir və bir gün sən həmin sujetləri yazmağı planlayırsan. Məndə də bu cür oldu. Əslində yazmağa çox-çox uşaq yaşlardan başlamışdım sadəcə özüm üçün cızma-qara edirdim. Kitablar məni ilhamlandırdı çünki oxuduqca hər bir insanda yazmaq sevgisi mütləq yaranır bəziləri bir müddət sonra yazır bəziləri isə oxumağı üstün tutur.

• “Qırmızı və Mavi” – təsirli hekayələrdən biridir. Oxuduqca fərqli düşüncələr yaranır təsəvvürdə. Hekayənin tarixçəsi nədir? Hansı hisslər altında yazılıb?

Qırmızı və Mavi hekayəsi deyərdimki yazdıqlarım arasında tam fərqli yerə sahibdir və digərlərindən ciddi fərqlənir. Çünki hekayənin sujeti olduqca ağırdır və ciddi şəkildə oxuyaraq analiz etmək tələb edir. Bu hekayənin sujeti üzərində bəlkədə bir aydan çox düşünmüşəm və sonunda bir gecə yarısı çoxdandır beynimdə qurmağa çalışdığım sujeti yazdım. Maraqlısı onda oldu ki, yazdıqca beynimdə qurduğun sujetdən çox fərqli bir şey meydana gətirdim. Hekayəni yazdığım gecə olduqca qarışıq hisslər içində idim və bir an durdum və özümə sual verdim “bu hekayəni görəsən tam anlayan oxucu olacaq?” və açığı hələ də bu suala dolğun cavab tapa bilməmişəm.

• Məzmunda çox saylı psixoloji və fəlsəfəi nöqsanlar var. Bu cür ağır məzmunlu hekayə yazmaq, oxucunu “ələ almaq” baxımından riskdir mi sizcə?

Bu hekayəni yazarkən özümə tam azadlıq vermişdim və əslində yazmağın ən gözəl cəhəti də heç zaman olmadığın qədər azad olursan. Bu hekayə heç bir halda oxucu zövqü üçün nəzərdə tutulmayıb yaxud kütlənin tələb etdiyi qədər sadə məzmuna da malik deyil bu baxımdan riski çoxdur məncə çünki oxuduqca oxucu hekayəni anlamır və bir müddət sonra sıxılaraq yarıda saxlayır sonda isə “çox mənasız hekayə idi” deyərək fikrini tamamlayır. Təbii ki, məsələnin bu tərəfi məni də narahat edirdi çünki dərindən analiz edərək oxuduqda hekayənin çox dərin qatlarının olduğu anlaşılır sadəcə diqqətli oxuma tələb olunur. Mən əslində bu fikri çox sevirəm “kütlənin zövqünün arxasınca getməkdənsə kütlədə zövqü formalaşdırmaq daha yaxşıdı” bu hekayəni də bu fikrə uyğun yazmışam.

• Kamil obrazı ilə “ana və övlad” münasibətlərini xüsusi ilə qeyd edirsiniz. Bu haqda düşüncələriniz nələrdir?

Ümumiyyətlə ana və övlad münasibəti çox dərin və əsl sevgi ilə hörülmüş bir münasibətdir və məndə bu hekayədə bu sevginin dərinliyini birdaha sadəcə fərqli rakursdan göstərməyə çalışmışam. Ananın hansı vəziyyətdə olmasına baxmayaraq övladına bəxş etdiyi sevgi, sonsuz, qarşılığı gözlənilməyən  və ən gözəl sevgidir.

• Murad Ramazanov “Qırmızı və Mavi” hekayəsini hansı janra ayird edir?

Qırmızı və Mavi hekayəsi deyərdim ki, sürreal psixoloji bir hekayədir çünki hekayədə psixoloji məqamlar olduqca çoxdur. Bundan əlavə isə hekayə bir xətt üzərində davam etmir və çoxlu şaxələrə bölünür və fərqli baxış bucağından nəql olunur. Bəlkə bu da hekayəni daha fərqli edir. Ümid edirəm hər kəs bu hekayəni diqqətlə oxuyub özünə uyğun fikirlər çıxardacaq və sonda da fikirlərini mənimlə bölüşəcək. Buna çox şad olardım.

Sizə də ayrıca minnətdaram ayırdığınız zaman və müsahibə üçün.

Müsahibəni hazırladı-“Sonuncu Əsr” Jurnalistika bölməsinin rəhbəri,jurnalist Aysel Qarayeva