Müəllimlər- Öyrədənlər Günü

5 oktyabr tarixi ölkəmizdə müəllimlər- öyrədənlər günü kimi qeyd olunur. Müəllimlik, ən şərəfli peşədir. Bir toplumu, xalqı gələcəyə hazırlayan qutsal şəxslərdir onlar.Milləti yalnız və yalnız müəllimləri xilas edə bilər. Bir cəmiyyətin millət ola bilməsi üçün mütləq müəllimlərə ehtiyacı var: onlar cəmiyyəti həqiqi bir millət halına gətirirlər məhz bu sözlər dahi lider Mustafa Kamal Atatürkə aiddir. Bir toplumda müəllimlərə duyulan sayğı nə qədər yüksək olarsa, o toplumda sivilizasiya daha yüksək olar. Bu qutsal peşənin sahibləri bizi gələcək yaşamımıza, gələcək peşəmizə hazırlayıb, yetişdirir və toplumda özümüzə xas yer tutmağımıza yardım edirlər. Bu həyatda hər bir insanı, dahini, lideri yetişdirən, alimə alimlik verən, lideri lider edən məhz onun müəllimidir. Müəllimlik peşəsini yüksək dəyərləndirən HZ. İmam Əli ” mənə bir hərf öyrədənin  köləsi olaram ” buyurmuşdur. Mustafa Kamal Atatürk müəllimi şama bənzətmiş və ” müəllim bir şama bənzər,özünü əridərək başqalarına işıq verər ” demişdir. Heydər Əliyev də müəllimlik peşəsinə böyük dəyər vermiş və ” müəllim yeganə şəxsiyyətdir ki, cəmiyyət özünün gələcəyini-uşaqların tərbiyəsini yalnız ona etibar edir ” ifadəsini işlətmişdir. Azərbaycanın ikinci prezidenti Əbülfəz Elçibəy də məhz müəllim olmuş və tələbələr arasında milli oyanış təbliğatı aparmışdır. Bağamsızlıqdan sonrakı prezidentliyi dönəmində də müəllimlərə yüksək dəyər vermişdir. Mənim ilk dərs günümdə əlimdən tutaraq qələm tutmağı, yazı yazmağı öyrədən  qutsal əllərdən sayğı ilə öpürəm. Məni topluma hazırlayan ilk müəllimim Vaqif müəllimin simasında bütün müəllimlərimin və müəllimlərimizin qarşısında sayğı ilə baş əyirəm. Nə yaxşı ki, sizlər varsınız, əziz müəllimlər!