Molekulyar Biologiya və Biotexnologiyalar İnstitutunda Beynəlxalq Qızlar Günü qeyd edilib

Azərbaycan Milli Elmlər Akademiyasının Molekulyar Biologiya və Biotexnologiyalar İnstitutunda Beynəlxalq Qızlar Gününə həsr olunmuş tədbir keçirilib.

İnstitutdan AZƏRTAC-a bildiriblər ki, bu qurumun qadın əməkdaşlarının iştirak etdikləri tədbirdə Qadınlar Şurasının sədri, biologiya üzrə fəlsəfi doktoru Fazilə Qasımova Beynəlxalq Qızlar Gününün təsis tarixi haqqında məlumat verib. Qeyd edib ki, bu əlamətdar gün BMT Baş Assambleyasının 2011-ci ildə verdiyi təklifə əsasən, 2012-ci ildən etibarən hər il oktyabrın 11-də qeyd olunur. Bu günün keçirilməsində əsas məqsəd diqqəti qızların hüquqlarının müdafiəsinə, onların zərif cinsin nümayəndələri kimi bilavasitə üzləşdikləri sosial problemlərə, oğlan və qızlar arasında gender bərabərliyinin təmin olunmasına yönəltməkdir. Təhsil almaq, sağlam qidalanmaq, tibbi xidmət imkanı, sosial hüquqlar, habelə zorakılıqdan və məcburi evlilikdən müdafiə olunmaq həmin problemlər sırasındadır.

Təsadüfi deyil ki, BMT baş katibinin müraciətində qız uşaqlarına səlahiyyət verilməsi, layiq olduqları təhsil imkanlarının yaradılması, onların hüquqlarının təmin olunması, qarşılaşdıqları ayrı-seçkilik və zorakılıq hallarına qarşı mübarizə bəşəriyyətin inkişafı üçün vacib amil kimi vurğulanır.

Sonra tədbirdə institutun qadınlar şurasının sədr müavini, biologiya üzrə fəlsəfə doktoru Səadət Xudaverdiyeva 2012-ci ildən bəri Beynəlxalq Qızlar Günündə qaldırılan problemləri ətraflı şərh edib.

İnstitutun Gənc Alim və Mütəxəssislər Şurasının sədri Ulduzə Qurbanova diqqətə çatdırıb ki, bütün işlərin ağırlığı qadınların üzərinə düşür. İndiki qızlar gələcəyin anasıdır. Sağlam ana həm dünyagörüşlü ailə, həm də təhsilli cəmiyyət deməkdir.

Sonra institutun gənc əməkdaşı, bioadaptasiya laboratoriyasının böyük laborantı Gülnar Abdullayeva ümummilli lider Heydər Əliyevin “Təhsil millətin gələcəyidir” kəlamını yada salıb. O qeyd edib ki, müsəlman Şərqində ilk dünyəvi qızlar məktəbi 1901-ci ildə böyük xeyriyyəçi Hacı Zeynalabdin Tağıyev tərəfindən yaradılıb. Azərbaycan Xalq Cümhuriyyəti dövründə ölkə ərazisində yaşayan bütün xalqların və hər iki cinsin bərabər seçki hüququ qanunvericiliklə təsbit edilib. Bununla da Azərbaycan Şərqdə qadınlara seçki hüququ verən ilk ölkə olub. Ulu öndər Heydər Əliyev tərəfindən əsası qoyulan gənclər siyasəti bu gün Prezident İlham Əliyev tərəfindən uğurla davam etdirilir.

Tədbirin sonunda Fazilə Qasımova bütün qızları bayram münasibətilə təbrik edərək onlara sağlamlıq və işlərində müvəffəqiyyətlər arzulayıb.

MƏNBƏ:AZƏRTAC

BIR CAVAB BURAXIN

Rəyinizi daxil edin
Adınızı daxil edin