Mərd düşmən – Trikupis

Trikupis bacarıqlı və müharibə qaydalarına riayət edən bir hərbçi olub. Yunanlar Anadolunun böyük bir hissəsini tutmuşdular. Trikupis o zamanlar ön cəbhədəki generallardan biri idi. Türklərin qəfil hücuma keçməsindən sonra vəziyyəti düzgün dəyərləndirərək yunan baş qərargahını məlumatlandırsa da, baş qərargah onun məsələni böyütdüyünü düşünüb. Çünki heç kəs türklərin belə ildırımsürətli hücumunu gözləmir və bunun baş verəcəyi ehtimalına belə inanmırmış.
Trikupis yunan ordusunun türklərin sürətli hücumu ilə üç yerə parçalanmasından sonra Dumlupınara vaxtında çatıb həlqəni yara bilmir və əsir düşür, Atatürkün yanına gətirilir. Bu vaxt o artıq özünün xəbəri olmasa da yunan ordusunun baş komandanı təyin edilmişdi. Mühasirədə olduğu üçün elə bu xəbəri də Atatürkdən alır.
Atatürk tərəfindən hörmətlə qarşılanır. Çünki yunan general özünü vaxtilə yaxşı aparıbmış. Ölən bir türk pilotuna cənazə mərasimi düzəldəcək qədər alicənab biriymiş. Minbaşı olan pilotu bu cür dəfn etməsini tənqid eləyənlər olub, amma o “biz bura ölülərdən intiqam almağa deyil, canlı və silahlı düşmənlə döyüşməyə gəldik” deyə cavab verib.
Atatürk də alicənab davranır, “intihar etməliydim” deyən Trikupisə “Napolyon da təslim olmuşdu, siz əlinizdən gələni elədiniz” deyə təskinlik verir. Müharibə bitdikdən sonra da geri qayıtmasını bir müddət əngəlləyir. Çünki məğlub generalların hamısı Yunanıstana çatan kimi güllələnirmiş. Trikupis güllələnməyən nadir generallardan olub və uzun bir həyat yaşayıb.
Ən maraqlısı ölənə qədər hər Atatürkü anma günündə türk səfirliyinə gedir, Atatürkü yad edirmiş. Tarixdə məğlub generalın qalibi anması nadir hadisələrdəndir. Düşmən olanda da gərək bu cür düşmənçilik edəsən.