“İnklüziv təhsil: əlilliyə fərqli baxış” mövzusunda onlayn görüş keçirilib

Avropa İttifaqının maliyyə dəstəyi ilə Heydər Əliyev Fondunun “Regional İnkişaf” İctimai Birliyi tərəfindən icra olunan “Müəllimlərin inklüziv təhsil sahəsində bacarıqlarının artırılması” və UNICEF-in Azərbaycan nümayəndəliyinin həyata keçirdiyi “Azərbaycanda əlilliyi olan uşaqlar üçün keyfiyyətli inklüziv təhsilin genişləndirilməsi” layihələri çərçivəsində Bakı Dövlət Universitetinin (BDU) müəllim-tələbə heyəti ilə “İnklüziv təhsil: əlilliyə fərqli baxış” mövzusunda onlayn görüş keçirilib.
AZƏRTAC xəbər verir ki, BDU-nun Sosial elmlər və psixologiya fakültəsinin dekanı, professor Hikmət Əlizadə onlayn tədbiri açaraq, inklüziv təhsilin inkişafının dünyanın bir çox ölkələrinin təhsil siyasətinin əsas prioritetlərindən olduğunu və ölkənin təhsil sisteminin beynəlxalq standartlara uyğunlaşdırılması məqsədi daşıdığını bildirib. Təlim metodikasına müvafiq olaraq inklüziv təhsil uşaqlara qarşı hər hansı formada ayrı-seçkilik edilməsinin qarşısını alır, əlilliyi olan uşaqlara da mükəmməl şəkildə təhsil almaq, uğur qazanmaq imkanı verir. Onun əsas vəzifəsi məhdud imkanlara malik insanların peşə hazırlığı üçün sərhəd tanımayan mühit yaratmaqdır. H.Əlizadə Azərbaycan Respublikasının 1992-ci ildə BMT-nin İnsan Hüquqları Konvensiyasını imzalayaraq inklüziv təhsilin inkişafı istiqamətində mühüm işlər gördüyünü diqqətə çatdırıb. Bildirib ki, fiziki məhdudiyyəti olan uşaqların daha keyfiyyətli təhsilə yiyələnməsi, cəmiyyətə tez adaptasiyası üçün digər yaşıdları ilə bir yerdə olması daha məqsədəuyğundur.
UNICEF-in Təhsil proqramı üzrə rəhbəri və mütəxəssisi Leyla Həsənova inklüzivlik və inklüziv təhsil anlayışların daha geniş olduğunu vurğulayaraq, inklüzivlik tək əlilliyi olan şəxslərin deyil, bütün təcrid olunmuş həssas əhali qruplarının da (məsələn, qaçqın, məcburi köçkün əhalisi, miqrantlar ola bilər) təhsilə və cəmiyyətə cəlb olunmalarını nəzərdə tutduğunu bildirib. Belə ki, inklüziv təhsil dinindən, irqindən, fiziki və əqli vəziyyətindən asılı olmayaraq hər bir uşağın, hər bir gəncin yararlana biləcək anlayışdır.
“Zoom” platforması üzərindən baş tutan görüş “Regional İnkişaf” İctimai Birliyinin inklüziv təhsil üzrə mütəxəssisi Fərid Süleymanovun moderatorluğu ilə davam edib.
Motivasiya spikeri, tərcüməçi, yazar və “ƏSA” teatrının aktrisası Cəmilə Məmmədli həyatından, uğurlarından, nailiyyətlərindən danışaraq ingilis dilini öyrəndiyini, tərcümələr etdiyini, hekayələr yazdığını vurğulayıb. Oxucularının ona stimul verdiyini deyən gənc, hekayə yazmağın onu həyatda irəliyə aparan ən vacib məqam olmasından bəhs edib. Cəmilə Məmmədli bildirib ki, cəmiyyətdə əlilliyi olan şəxslərə münasibətdə mövcud stereotiplərin aradan qaldırılmasının və bərabərhüquqlu cəmiyyətin formalaşdırılmasının ən yaxşı vasitəsi inklüziv təhsildir.
Onlayn görüşün keçirilməsinin əsas məqsədi inklüziv təhsilin əhəmiyyətini, əlilliyi olan insanların cəmiyyətə inteqrasıyasının vacibliyini ictimaiyyətin diqqətinə çatdırmaqdır.

Mənbə : AZƏRTAC

BIR CAVAB BURAXIN

Rəyinizi daxil edin
Adınızı daxil edin