Get more stuff like this
Subscribe to our mailing list and get interesting stuff and updates to your email inbox.
Thank you for subscribing.
Something went wrong.
Azərbaycan qadını tarixən öz zəkası, hünəri ilə hər bir dövrün aparıcı qüvvəsi kimi parlamış və tarixdə özünəməxsus iz qoymuşdur. Tariximizin səhifələrində Azərbaycan qadını özünü bütün incəsənət,mədəniyyət,elm sahələrində fəal nümayiş etdirib. Zamanla, Azərbaycan qadını güclü siyasətçi, dövlət xadimi,həssas qəlbli şairə və qayğıkeş ana olmuşdur.
Azərbaycan tarixində dərin iz qoyan qadınlarımızın sayı kifayət qədər çoxdur. Onların rolu tariximizdə danılmazdır. Belə qadınlarımızdan biri də ilk qadın nazirimiz olan Tahirə Tahirovadır. Tahirə xanımın atası Əkbər Tahirov Qori müəllimlər seminariyasını bitirdikdən sonra rus dili müəllimi olaraq Türkmənistan vilayətinə göndərilir. Azərbaycanın ilk xanım naziri-Tahirə Tahirova 1913-cü il noyabr ayının 7-də Türkmənistanın Bayraməli vilayətində ziyalı ailəsində dünyaya göz açır. Sonralar Tahirovlar ailəsi Bakıya köçür və Tahirə orta təhsilinə Bakıda başlayır.
O, 1935-ci ildə Azərbaycan Sənaye İnstitutunu(AzSİ) bitirmişdir. T.Tahirova neft sənayesi üzrə ali təhsil alan ilk azərbaycanlı qadın-mütəxəssis olmuşdur.
T.Tahirova əmək fəaliyyətinə 1936-cı ildən elmi işçi kimi başlamış, sonra o, Azərbaycan Neft Elmi-Tədqiqat İnstitutuna direktor təyin olunur. Tahirə xanım neft mühəndisi kimi Bakının bir sıra neft müəssisələrində çalışır. Tahirə xanım öz xatirələrində qeyd edir: “İlk vaxtlar orada işləmək mənim üçün çox çətin idi, çünki o zamanlar mədənlərdə çalışan xanımlar yox səviyyəsində idi və kişilər məni kollektivlərində qəbul etmək istəmirdilər”. Lakin Tahirə xanım bütün bu çətinliklərdən uğurla keçir.O,Böyük Vətən Müharibəsi dövründə cəbhənin fasiləsiz neft təchizatına cavabdeh idi. 1936-cı ildə o, “Lenin” ordeni, “Qırmızı Əmək Bayrağı” ordeni və “Şərəf nişanı” ordeni ilə təltif olunmuşdur.
T.Tahirova 1957-ci ildə xarici işlər naziri vəzifəsinə təyin olunur. Lakin o, vəzifəsinin icrasına yalnız 1959-cu ildə öz təşəbbüsü ilə SSRİ XİN-nin Diplomatik Akademiyasını bitirdikdən sonra başlayır. Tahirə xanım mədəni-siyasi davranışı, ünsiyyət bacarığı və s. bu kimi şəxsi keyfiyyətləri ilə istər ölkəyə gələn xarici qonaqların, istərsə də özü xarici səfərlərdə olarkən həmkarlarının və siyasi xadimlərin rəğbətini qazana bilir. O, türk, ingilis və rus dillərində səlis danışmağı bacarırdı. Bütün bunlar nazir xanımdan gərgin zəhmət, yuxusuz gecələr,əsl diplomat səriştəsi, məsuliyyət, ən əsası isə səbr, dözüm və iradə tələb etmişdir.
Həmçinin, T.Tahirova dünya ölkələrinin bütün ali məclislərində iştirak etmiş ilk azərbaycanlı qadın olub. T.Tahirova nazir işlədiyi müddətdə Azərbaycan diplomatlarının SSRİ-nin səfirliklərində işləməsinə, Diplomatik Akademiyasında oxumasına daima diqqət yetirmişdir.
Tahirova SSRİ nümayəndə heyətlərinin tərkibində Hindistan, Birma, İndoneziya və Əfqanıstanda, 1961-1962-ci illərdə isə SSRİ Qadınlar Komitəsi nümayəndə heyətlərinin tərkibində Tunis, Türkiyə və Əlcəzairə səfər edir. Məhz onun gərgin əməyi nəticəsində 70-80-ci illərdə Azərbaycanın beynəlxalq iqtisadi, mədəni, elmi-texniki və b. əlaqələri xeyli artdı, coğrafiyası daha da genişləndi.
T.Tahirova 1984-cü ilə qədər xarici işlər naziri kimi fəaliyyət göstərmiş və həmin ildə 71 yaşında təqaüdə çıxmışdır. 1991-ci ildə 71 yaşında vəfat etmişdir.
Çinarə Əliyeva
