Həştərxanda Xəzəryanı ölkələrin jurnalistləri üçün müsabiqə keçiriləcək.

Həştərxanda ənənəvi Xəzəryanı mediaforum çərçivəsində keçirilən “Sərhədsiz Xəzər” beynəlxalq jurnalist müsabiqəsinə sifarişlərin qəbulu davam edir.
AZƏRTAC astravolga.ru saytına istinadla xəbər verir ki, müsabiqəyə işlər Xəzəryanı region ölkələrinin KİV-lərindən, yaradıcı qruplarından və müstəqil jurnalistlərindən qəbul edilir. Müsabiqənin təşkilatçısı Həştərxan vilayəti qubernatorunun administrasiyasıdır. Sifarişlər 2018-ci il avqustun 31-dək aşağıdakı nominasiyalar üzrə qəbul edilir: “FotoKaspi” (Xəzəryanı ölkələrin əməkdaşlığı haqqında mətbu KİV-lərdə və ya internet-nəşrlərdə dərc olunmuş ən yaxşı foto işi); “İnsan və dəniz” (Xəzərin ekologiyası məsələlərinə həsr edilmiş, mətbu KİV-lərdə və ya internet-nəşrlərdə dərc olunmuş, televiziya və ya radio efirində təqdim olunmuş ən yaxşı yazı və ya foto); “Xəzər ölkələrini kəşf edərkən” (Mədəniyyətə, görməli yerlərə və turizmə həsr edilmiş, mətbu KİV-lərdə və ya internet-nəşrlərdə dərc olunmuş, televiziya və ya radio efirində təqdim olunmuş ən yaxşı yazı və ya foto); “Xəzər – sağlamlıq ərazisi” (idman, sağlam həyat tərzi məsələlərinə həsr edilmiş, mətbu KİV-lərdə və ya internet-nəşrlərdə dərc olunmuş, televiziya və ya radio efirində təqdim olunmuş ən yaxşı yazı və ya foto); “Təzə baxış” (yuxarıda sadalanan hər hansı nominasiya üzrə yaşı 30-a qədər olan iştirakçılar tərəfindən təqdim edilmiş, ən yaxşı iş). Müsabiqənin Qran-prisi də təqdim ediləcək.
Sifarişi elektron formada info@media-caspy.com ünvanına rus, ingilis dillərində və ya Xəzəryanı ölkələrdən birinin rəsmi dilində, rus dilinə tərcümə olunmaqla təqdim etmək olar. Müsabiqəyə 2017-ci il sentyabrın 1-dən 2018-ci il avqustun 31-dək (31-i də daxil olmaqla) KİV-lərdə dərc olunmuş işlər qəbul edilir.
Müsabiqəyə təqdim edilən işlərə irəli sürülən tələbələr, müsabiqənin əsasnaməsi və sifarişlərin təqdim olunması qaydası Xəzər mediaforumu-2018 rəsmi saytının “Müsabiqə” əlavəsində dərc edilib. Müsabiqə ilə bağlı məsələlərə dair məsləhətləri elektron poçt (info@media-caspy.com) vasitəsilə və 8 (8512) 51-03-76, 51-84-69 nömrəli telefonlara zəng vurmaqla ala bilərsiniz.
Qaliblərə mükafatlar sentyabr ayında təqdim ediləcək.

Mənbə : Azərtac

BIR CAVAB BURAXIN

Rəyinizi daxil edin
Adınızı daxil edin