Gün keçdi.

1970-ci illər öz dəb dünyasından əlavə kino tarixinin inkişafı ilə də yadda qalmışdır. Azərbaycan da dünya mədəniyyətinin yeniliklərini özünə uyğunlaşdıraraq incəsənət sahəsinin inkişaf etməsinə səbəb olmuşdur. Bəhs edilən illərdə kino tariximizə bir neçə film daxil olmuşdur ki,bunlardan biri də Anarın “Gürcü familiyası” hekayəsi əsasında lentə alınan “Gün keçdi” filmidir. Rejissor Arif Babayevin romantik-dram janrında çəkdiyi bu filmin baş rollarını kino tariximizin sevilən simaları – Həsən Məmmədov və Leyla Şıxlinskaya ifa etmişlər. 

İki gəncin nakam məhəbbətindən bəhs edən bu filmi bəzən “iki aktyorla rejissor işi“ də adlandırırlar. Həqiqətən də bütün hadisələrin bu iki şəxs ətrafında cərəyan etdiyini izləyən tamaşaçı 83 dəqiqə ərzində yorulmur,bezmir.

Gənclik illərində bir-birini sevən Oqtay və Əsmər uzun illərdən sonra görüşürlər. Zahirən  çox xoşbəxt görünən Əsmər daxilən heç də elə olmadığını büruzə verir.. O bir vaxtlar onların hər ikisinə dərs demiş ingilis dili müəllimləri Camalla ailə qurub və ölkəni tərk etmişdir. Diplomat kimi xarici ölkələrə səfər edən həyat yoldaşı ilə bir qızları da var. Lakin, bütün bunlar Əsməri xoşbəxt etmir,ona uşaqlıq sevgisini unutdurmağa qadir deyil.

Oqtayın doğum günü üçün Bakıya bilet alan Əsmər öz qəfil gəlişi ilə onu təəccübləndirir. Lakin,onun unutduğu bir şey var..Oqtayın doğum günü həmin gün yox,onun səhərisi gün idi.. O uşaqlıq sevgisi ilə görüşür və ona keçmiş xatirələrdən,keçirdikləri o gözəl günlərdən danışır.

Hekayənin adı niyə “Gürcü familiyası“ adlanırdı? Gürcü soyadının “Gün keçdi“ filmi ilə nə əlaqəsi ola bilər? Məsələ burasındadır ki,Əsmərlə Oqtay kinoteatrda kamikadzelər haqda film izləyirlər.Əsmər isə bu sözü gürcü soyadına bənzədir və Oqtaya göndərdiyi təbrik teleqramında da öz ismini belə qeyd etmiş olur..

Film romantik-dram olmaqdan əlavə dövrün ən böyük problemini işıqlandırmaq baxımından da böyük əhəmiyyət kəsb edir. Çünki,həmin illərdə İçərişəhərin sökülməsi,yoxsa saxlanması məsələsi geniş müzakirə olunurdu və filmdə bu məsələyə səssiz qalına bilinməzdi..

Filmin ssenarisində dəyişiklik də olmuşdur.Belə ki,son kadrların Azərbaycan kişisinin xarakterinə uyğun olmadığını deyən və bu kadr çıxarılmayacağı halda filmə çəkilməyəcəyini bəyan edən Həsən Məmmədov ssenarinin dəyişdirilməsinə nail olmuşdur..

Filmdə səsləndirilən mahnılar isə xalq tərəfindən indi də sevilməkdədir. Filmin bəstəkarı E.Sabitoğlu,musiqilərin mətn müəllifi V.Səmədoğludur. İfalar isə F.Kərimovaya,M.Babayevə və o dövrdə gündəmin ən sevilənlərindən olan Qaya qrupuna məxsusdur.

Uşaqlıq illərində baş verənləri,gözəl günləri geri qaytarmaq istəyən Oqtay və Əsmər bu iqtidarda deyillər,bunun üçün çox gecdir.O səbəbdən də filmə “Gün keçdi“adı verilmişdir..

BIR CAVAB BURAXIN

Rəyinizi daxil edin
Adınızı daxil edin