Göygöl rayonunda son tunc-erkən dəmir dövrü kurqanları araşdırılır

Azərbaycan Milli Elmlər Akademiyası (AMEA) Arxeologiya və Etnoqrafiya İnstitutunun şöbə müdiri, tarix elmləri doktoru, professor Arif Məmmədovun rəhbərlik etdiyi Gəncə-Göygöl arxeoloji ekspedisiyası Göygöl rayonunda arxeoloji qazıntı və çöl-tədqiqat işləri aparıb.

İnstitutdan AZƏRTAC-a bildiriblər ki, əsas arxeoloji qazıntı işləri Göygöl rayonunun Quşqara bələdiyyəsi ərazisində, Gəncə şəhərində Heydər Əliyev parkına yaxın ərazidə, Gəncə-Şəmkir yolunun sağında, Quru qobunun sol tərəfində, Quşqara bələdiyyəsi ərazisindəki kurqantipli qəbirlərdə aparılıb. Arxeoloji qazıntı işlərinə Göygöl Rayon İcra Hakimiyyəti tərəfindən müvafiq kömək göstərilib. Arxeoloji qazıntıların nəticələri göstərir ki, əslində kurqan kimi təqdim olunan abidələr sadəcə kurqantipli qəbirlərdir və Azərbaycanın son tunc dövrü köçəri tayfalarının adət-ənənələrini, həyat tərzini əks etdirir.

Kurqantipli qəbirlərin üstü çay daşı ilə örtülüb. Möhkəmlik yaratmaq və suyun kameraya dolmasının qarşısını almaq məqsədilə daşların arasına ağ torpaq, əhəng qatı verilib. Qəbirlərin üzərindəki daş yığını və torpağın bir hissəsi ətrafda olan istixanalardan gətirilən qalıqlardan və əkin sahələrindən toplanılan daşlardan ibarətdir. Kurqantipli qəbirlərdən yalnız ikisində skelet qalıqlarına və son tunc-ilk dəmir dövrünə aid saxsı qabların hissələrinə rast gəlinib.

Ekspedisiya tərəfindən cari mövsümdə həm də ətraf ərazilərdə arxeoloji kəşfiyyat işləri aparılıb. Rayonun Yeni Göyçə kəndindəki alban məbədində aparılan arxeoloji tədqiqatlar məbədin IV-V əsrlərdə tikildiyini, lakin XIX əsrdə abidədə yenidən bərpa işləri aparıldığını söyləməyə əsas verir. Məbədin tavanına saxsı qabların doldurulması akustikanın yüksəldilməsi məqsədi daşıyıb. Qablar divarların arasında üzü aşağıya doğru yerləşdirilib.

Göygöl rayonunda arxeoloji tədqiqat işlərinin davam etdirilməsi nəzərdə tutulur.

MƏNBƏ:AZƏRTAC