Gələcəyimizi qoruyaq!

Uşaqlar olmasaydı insanlığı bu qədər sevə bilməzdik.

F.Dostoyevski

Gəlin sabahımız olan uşaqları bu gün qoruyaq, onların bizim sevgimizə ehtiyacı var…

Bu dünyada uşaq olmaq böyük olmaqdan çətindir. Bəzən biz böyüklər körpələrin sadəcə sevgiyə və qayğıya ehtiyacı olduğunu unuduruq. Onların saf, təmiz, bütün çətinliklərdən uzaq olan dünyaları bizim dünya deyə yaşadığımız bu aləmdən o qədər təmiz, kiçik bir pislik belə bilməyən qəlbləri biz böyüklərin qəlbindən bəşəriyyət qədər böyükdür. Bizlərin nankor olduğumuz zamanlarda su kimi pak ürəklərin sahibləri kiçik şeylərlə sevinməyi, gülməyi bacarırlar. Bizlər insanları, dünyanı sevməyi, sevilməyi, bir gülüşün nələrə qadir olduğunu gözəl üzlü körpələrdən öyrənirik. İnsanlar xoşbəxtliyi o qədər fərqli yerlərdə axtarırlar ki… Amma ətraflarına baxsalar onları milyonlarla xoşbəxtliyin əhatə etdiyini, xoşbəxtliyi onlara bəxş edəcək varlıqların yanı başlarında olduğunu görərlər. Bu böyük xoşbəxtliyi əldə etmək üçün kiçicik sevgi və qayğı yetər. Bəzən isə bizlər xoşbəxt olmadığımızı deyirik…Məyər kimsəsiz bir körpəyə bir şokolad belə verdiyimiz zaman onun üzündəki o bir anlıq təbəssüm, gözlərinin sevinclə günəş kimi parlaması xoşbəxtlik deyilmi…?!Yaxud da bir ananın hələ yenicə doğulmuş körpəsini göz yaşları ilə bağrına basması dünyanın ən böyük xoşbəxtliyi deyilmi…?!Həyatımızda bu qədər gözəlliklər olduğunu bilərək gəlin xoşbəxtliyi, sevgini, təbəssümü başqa yerlərdə deyil, bu balaca fidanların gözlərində axtaraq və onların qar kimi bəmbəyaz dünyasını böyük problemlər dediyimiz, əslində, həll etməsi o qədər də çətin olmayan şeylərlə qaranlığa çevirməyək. Çünki bu körpələr biz böyüklərdən həyatı öyrənməyə çalışır, gələcəkdə kim olacaqlarını ata və analarına, müəllimlərinə, böyüklərə baxaraq öyrənirlər. Gəlin, gələcəyimiz xoşbəxtlik və sevgi dolu bir dünya olsun…Unutmayaq ki, özümüzü böyük hesab etsək də, hər birimizin qəlbinin dərinliklərində bir uşaq yatıb və o uşağı oyada bilsək inanın dünyanın ən xoşbəxt insanı bizlər olarıq, çünki uşaqlar pislik, çirkinlik nədir bilməzlər…Düşünürsən ki, gələciyinin qırılmaz, möhkəm bir körpü olması üçün sən nə edə bilərsən? Çox şey edə bilərik, əzizlərim. Bizim kiçik saydığımız şeylər körpələrin bir təbəssümünə səbəb ola bilər. Düşünürəm ki, hər kəs əlindən gələni etsə, yardıma, köməyə ehtiyacı olan, bizim hər sözümüzdə “uşaqlar bizim gələcəyimizdir” dediyimiz körpələri pisliklərdən uzaq tutsa, onlara dünyanın necə gözəl bir yer olduğunu, oxumağın, elmin hər insana lazım olduğunu öyrətsə gələcəyimiz əmin əllərdə olar. Bəli, əziz oxucular, Sonuncu Əsr gəncləri də uşaqlara necə yararlı ola bilərik deyə düşündülər və elmin, oxumağın, mütaliənin körpələrə hər şeydən çox lazım olduğunu anladılar. Beləliklə, 1 İyun Uşaqların Beynəlxalq müdafiəsi günü münasibətilə italyan yazarı Susanna Tamaronun “Kitablardan qorxan uşaq” əsərini Azərbaycan dilinə tərcümə edərək, bu balaca fidanlara hədiyyə etməyi qərara aldılar. Digər layihələrimizdə olduğu kimi bu işimizlə də millətə və vətənə, ən əsas da bu balaca körpələrə bir qığılcım qədər yardım etmiş olacayıqsa, nə xoşbəxt bizlərə…