“Ədibin evi”ndə dünya milli kitabxanalarından dəvət olunmuş qonaqlarla görüş keçirilib

Sentyabrın 28-də Azərbaycan Milli Kitabxanasının 95 illik yubileyinə həsr olunan “Milli kitabxanalarda innovasiyalar- dəyişikliklərin əsası və inkişafın istiqaməti kimi” mövzusunda beynəlxalq elmi-praktik konfransa dünya milli kitabxanalarından dəvət edilmiş qonaqlarla görkəmli yazıçı, alim-pedaqoq Mir Cəlal Paşayevin bir vaxtlar yaşadığı ünvanda – İçərişəhərdəki “Ədibin evi”ndə görüş keçirilib.

AZƏRTAC xəbər verir ki, “Ədibin evi”nin nümayəndəsi Elnur İmanbəyli qonaqları yazıçının bir vaxtlar yaşadığı ev ilə tanış edib, ədibin ömür yolu və yaradıcılığı haqqında məlumat verib.

Milli Kitabxananın direktoru, professor Kərim Tahirov çıxış edərək qonaqlara görkəmli yazıçının zəngin yaradıcılığından söhbət açıb, həmçinin kitabxana tərəfindən Mir Cəlal Paşayev haqqında fundamental biblioqrafiyanın nəşr edildiyini söyləyib. Biblioqrafiyada ədibin dünya kitabxanalarında mühafizə olunan bir çox kitablarının da yer aldığı bildirilib.

Sonra Slovakiya Milli Kitabxanasının nümayəndəsi Janka Dropkova “Bir gəncin manifesti” əsərinin slovak dilində olan nüsxəsini “Ədibin evi”nə hədiyyə edib.

Daha sonra qonaqlar yeni istifadəyə verilmiş Bakı Kitab Mərkəzində, Miniatür Kitab Muzeyində olublar.

MƏNBƏ:AZƏRTAC