Dirilərin yer üzündəki hesablaşması – VİCDAN

Vicdan elə bir şeydir ki, ondan yoxsun qalmaq mənəvi qüsur, ona sahib olmaq Tanrının ən ağır cəzasıdır. Mənə inanın, cəhənnəm əzabını görmüş olmasam belə, geridə qoyacağına şübhəm yoxdur.
Vicdanın varsa, güclü yaddaşın var deməkdir. Etdiyin səhvləri elə tazə saxlayar ki, oyandığın hər yeni sabaha onunla başlayarsan. Nə qədər unutmaq istəsən də, “unutma istəyinin” heç ədalətli olmadığını düşünüb bir də bunun vicdan əzabını çiyninə alma qorxusu yaşayarsan. Vicdanı olan kəslər üçün edilən yanlışın böyüyü, kiçiyi olmaz. Bəzən səni buna məcbur edən şeytanı, ya da çilədən çıxaran insanları ağlına gətirib haqq qazandırmaq istəyərsən özlüyündə amma nafilə. Vicdanın var ya, şeytana belə şər atmaqdan çəkinər. Şeytan ki səni heç nəyə məcbur etmir, dəvət edir. Bəlkə yanılıram? Hər kəs özünə cavabdehdir.
Bu bilirsiniz nəyə bənzəyir? Palçıq bataqlığına.. O içindən çıxa bilmədiyin fikirlər səni özünə çəkər, bütün çabalarına rəğmən boğulub gedərsən. Bəli.. Vicdan budur.. Allahın səninlə uğraşmasına heç gərək duymadan bəxş etməklə kifayətləndiyi ruhi işgəncə metodu.
Yanlış etmək insan oğlunun doğal haqqıdır. Kim mükəmməl ola bilər ki? Hətta insanı kamilləşdirən, onu sonradan doğru addımlar atmağa sövq edən şey keçmişdə atdığı yanlış addımlarıdır. Səni bütün yanlışlarınla, olduğun kimi qəbul edən insanlar tapılar amma sən özünü əsla qəbul etməzsən. Əgər vicdanın varsa. Qəlbini qıran insanları vicdanlı olduğun üçün bağışlayarsan, öz yanlışlarını isə vicdanlı olduğundan yox. Vicdan özünücəza deməkdir, vicdan daha o dünyadakı hesablaşmanı ölmədən vermək deməkdir. Vicdan hakimdir, sən həm məhbus, həm qurban..

Yazar : Nigar Süleymanova

BIR CAVAB BURAXIN

Rəyinizi daxil edin
Adınızı daxil edin