Get more stuff like this
Subscribe to our mailing list and get interesting stuff and updates to your email inbox.
Thank you for subscribing.
Something went wrong.
Azərbaycanın Cenevrədə BMT bölməsi və digər beynəlxalq təşkilatlar yanında daimi nümayəndəliyinin, BMT-nin Cenevrə ofisinin təşkilatçılığı və SOCAR tredinq şirkətinin dəstəyi ilə BMT nin Cenevrədəki Baş qərargahındakı “Millətlər sarayı”nda “Əli və Nino” filminin təqdimatı keçirilib.
Azərbaycanın Cenevrədə BMT bölməsi və digər beynəlxalq təşkilatlar yanında daimi nümayəndəliyindən APA-ya verilən məlumata görə, bədii filmin təqdimat mərasimində çıxış edən BMT-nin Cenevrə bölməsinin kitabxana rəhbəri Fırançesko Pisano yazıçı Qurban Səidin dünya bestselleri olan eyniadlı romanı əsasında ekranlaşdırılan “Əli və Nino” filminin Azərbaycanın müstəqillik uğrunda mübarizəsi və 20-ci əsrin əvvəlində Rusiyanın Azərbaycanı işğalı fonunda müxtəlif dinlərə etiqad edən iki gəncin sevgisindən bəhs etdiyini, dünyanın bir çox yerində izlənilən “Əli və Nino”nun musiqisini və kinematoqrafik keyfiyyətini yüksək dəyərləndirdiyini deyib.
O, yayımlanmış materiallarda filmin musiqisinin nostalji, eyni zamanda romantik, kədərli, bununla yanaşı ümidverici olduğunu qeyd edib.
Tədbirdə çıxış edən Azərbaycanın Cenevrədə BMT bölməsi və digər beynəlxalq təşkilatlar yanında daimi nümayəndəsi, səfir Vaqif Sadıqov əslən azərbaycanlı olan və Azərbaycan Demokratik Respublikasının bolşevik işğalından sonra Avropaya mühacir edən yazıçı Qurban Səidin 1937-ci ildə Avstriyada alman dilində çap olunan və 30-dan artıq xarici dilə tərcümə edilən eyniadlı əsərinin mövzusu üzrə çəkilən bu filmin o dövrün reallıqlarını, o cümlədən Cənubi Qafqaz xalqlarının mədəniyyəti, adət-ənənələri və milli xüsusiyyətlərini əks etdirmək baxımından çox əhəmiyyətli olduğunu vurğulayıb.
Vaqif Sadıxov filmin Heydər Əliyev Fondunun vitse-prezidenti Leyla Əliyevanın təşəbbüsü və prodüserliyi, Oskar mükafatı laureatı Asif Kapadianın rejissorluğu ilə çəkildiyini qeyd edib, ekran əsərinin ADR-in yaranmasından süqutunadək baş verən əsas hadisələri də obyektiv şəkildə işıqlandırdığını bildirib.
Səfir film haqqında məlumat verib.
Çıxış edən digər natiqlər – Gürcüstanın Cenevrədə BMT bölməsi və digər beynəlxalq təşkilatlar yanında Daimi nümayəndəliyinin rəhbəri Şalva Tısıskaraşvili, “SOCAR Trading” şirkətinin baş icraçı direktoru Arzu Əzimov bildiriblər ki, film azərbaycanlı gənc Əli ilə gürcü qızı Nino arasında məhəbbət hekayəsindən bəhs etməklə bərabər, XX əsrin əvvəllərində Cənubi Qafqazda baş verən siyasi hadisələri dolğun və obyektiv şəkildə təsvir edir.
Sonra qonaqlar filmi seyr ediblər. Filmi izləyən tamaşaçılar ekran əsəri haqqında yüksək təəssüratlarını bildiriblər.
Apa.az
