“Bir” Tələbə-Könüllü Proqramı 17 mindən çox tələbəni əhatə edir.

Azərbaycan Dövlət Pedaqoji Universitetində (ADPU) Təhsil Nazirliyinin “Bir” Tələbə-Könüllü Proqramının təqdimatı olub.
ADPU-dan AZƏRTAC-a bildirilib ki, tədbirdə 6 istiqamətdə fəaliyyət göstərən bu proqramın 17 mindən çox tələbəni əhatə etdiyi diqqətə çatdırılıb. Qeyd edilib ki, proqram Təhsil Nazirliyinin təşəbbüsü ilə ölkədə vahid tələbə könüllü bazasının yaradılması, gənclərlə işin təşkilinin sistemləşdirilməsi məqsədilə yaradılıb. Proqram çərçivəsində tələbələr könüllülük fəaliyyətinə və müvafiq tədbirlərə cəlb olunaraq dünyagörüşlərini genişləndirir və akademik təhsildən ayrılmadan sosial fəallıqlarını artırırlar. Proqramın seçim meyarlarına hər bir tələbənin könüllü şəkildə tədbirlərdə iştirak etməsi, təhsil aldığı ali təhsil müəssisəsində ictimai fəallıq göstərməsi, yüksək təşkilatçılıq bacarığı, stressə davamlılığı, təhlil və araşdırma aparmaq bacarığı, yaradıcılığı, yenilikçiliyi, müxtəlifyönümlü ictimai işlərdə təcrübəyə malik olması, xarici dilləri bilməsi daxildir. Proqram gənclərin asudə vaxtlarının maraqlı və səmərəli keçməsinə xidmət edir. “Bir” Tələbə-Könüllü Proqramı ilə bağlı bir çox universitetlərdə tədbirlər keçirilir. Bu proqram tələbələrə Avropa ölkələrində keçirilən beynəlxalq tədbirlərdə də iştirak etmək imkanı verir.
Təqdimatda “Bir” Tələbə-Könüllü Proqramı ilə bağlı videoçarx nümayiş etdirilib, maraqlı oyunlar keçirilib, tələbə-gənclərin sualları cavablandırılıb.

Mənbə : Azərtac