Bakı Musiqi Akademiyasında növbəti konsert unudulmaz sənətkar Firəngiz Əhmədovanın xatirəsinə ithaf edilib

Sentyabrın 24-də Üzeyir Hacıbəyli adına Bakı Musiqi Akademiyasında (BMA) görkəmli müğənni, Xalq artisti Firəngiz Əhmədovanın 90 illiyinə həsr edilmiş konsert proqramı təqdim edilib.

AZƏRTAC xəbər verir ki, konsert proqramı Mədəniyyət Nazirliyi, “Mədəniyyət” kanalı və Bakı Musiqi Akademiyasının birgə təşkilatçılığı ilə reallaşıb.

Üzeyir Hacıbəyliyə həsr edilmiş X Beynəlxalq Musiqi Festivalı çərçivəsində təşkil edilən konsertdə AzTV-nin Niyazi adına Simfonik Orkestrinin müşayiəti ilə Azərbaycan Dövlət Akademik Opera və Balet Teatrının solistləri – Azər Zeynalov, Nərgiz Kərimova, Gülnaz İsmayılova, Afaq Abbasova, Fəridə Məmmədova, İlahə Əfəndiyeva, İnarə Babayeva, Çinarə Şirin, Zemfira İsmayılova, Taleh Yəhyayev və Qərinə Kərimova çıxış ediblər. Konsert çərçivəsində “Koroğlu” operasından Nigarın, “Arşın mal alan” operettasından Gülçöhrənin, “Nərgiz” operasından Nərgizin, “Sevil” operasından Sevilin, “Vaqif” operasından Xuramanın, “Aida” operasından Aidanın, “Karmen” operasından Karmenin ariyaları və digər musiqi parçaları səsləndirilib.

Təqdim edilən konsert proqramı maraqla qarşılanıb.

Qeyd edək ki, lirik-dramatik soprano səs tembrinə malik müğənni F.Əhmədova 1950-1970-ci illərdə Akademik Opera və Balet Teatrının səhnəsində uğurla çıxış edib. O, Üzeyir Hacıbəylinin “Koroğlu” operasında Nigar, Müslüm Maqomayevin “Şah İsmayıl”ında Gülzar, “Nərgiz”də Nərgiz, Fikrət Əmirovun “Sevil”ində Sevil və başqa partiyaların mahir ifaçılarından olub. Müasir Azərbaycan mədəniyyətinin görkəmli nümayəndələrindən olan Firəngiz Əhmədovanın milli musiqimizin inkişafında mühüm xidmətləri var. Özünün unikal tembrli, geniş diapazonlu, güclü və məlahətli səsi ilə seçilən sənətkar klassik opera səhnəmizin ilk qadın ifaçılarından biri idi. Onun yaradıcılığı yüksək ifaçılıq qabiliyyəti və orijinal aktyorluq məharəti ilə səciyyələnərək ölkəmizin vokal sənəti tarixində silinməz izlər qoyub. F. Əhmədova opera səhnəmizdə Azərbaycan və dünya klassiklərinin şah əsərlərində aparıcı partiyaların mahir ifaçısı kimi şöhrət tapıb, musiqi salnaməmizə yeni parlaq səhifələr yazmağa müvəffəq olub.

MƏNBƏ:AZƏRTAC