Bəyoğlu bölgəsində binalardan birinin üzərinə görkəmli azərbaycanlı rəssam İbrahim Safinin xatirə lövhəsi vurulub

Azərbaycanın İstanbuldakı baş konsulluğunun təşəbbüsü və Azərbaycan Respublikası Dövlət Neft Şirkətinin (SOCAR) Türkiyədəki nümayəndəliyinin himayədarlığı ilə İstanbul şəhərinin Bəyoğlu ərazisində yerləşən məşhur və turistlərin daha çox ziyarət etdiyi “İstiqlal prospekti”nin görkəmli hissəsindəki binanın üzərinə tanınmış azərbaycanlı rəssam İbrahim Safinin xatirə lövhəsi vurulub.

AZƏRTAC xəbər verir ki, İbrahim Safi 1898-ci ildə Azərbaycanın Naxçıvan Muxtar Respublikasının indiki Şərur rayonunda anadan olub. Birinci Dünya müharibəsindən sonra Türkiyəyə gələn İbrahim Safi 1923-cü ildə İstanbul Gözəl Sənətlər Akademiyasında təhsil alıb. Mənzərə, natürmort və portret üslubunda rəsmlərini ərsəyə gətirən İbrahim Safi 1920-ci ildə Türkiyədə keçirilən Avropa rəssamları müsabiqəsinin mükafatına layiq görülüb. İbrahim Safinin rəsm əsərlərindən ibarət fərdi sərgiləri Türkiyə ilə yanaşı ABŞ, Fransa, İsveçrə və Avstriyada da təşkil olunub. Məşhur rəssam 1983-cü ildə İstanbul şəhərində dünyasını dəyişib. Bu gün də Türkiyədə ehtiramla xatırlanan İbrahim Safi, xüsusilə incəsənət xadimləri tərəfindən rəğbət və hörmətlə anılır.

Təxminən bir ildən artıq müddət ərzində aparılan intensiv danışıqlarda İbrahim Safinin məhz İstanbulun Bəyoğlu səmtində yaşadığı əsaslandırılıb. Məlumatlandırıcı xatirə lövhəsində Azərbaycan və Türkiyə dövlət bayraqları da həkk olunub. Eyni zamanda, xatirə lövhəsinin yanında, Bəyoğlu bələdiyyəsinin “ağıllı şəhər” konseptinin tərkib hissəsi olan QR Kod (Quick Response Code) lövhəsinin də quraşdırılması istiqamətində bələdiyyə rəhbərliyi ilə ilkin razılaşma əldə olunub. QR Kod lövhəsinin mahiyyəti istənilən məlumatın insanlar tərəfindən “ağıllı” telefonlarından istifadə etməklə rahat və çevik şəkildə əldə olunmasından ibarətdir. Bu QR Kod vasitəsilə İbrahim Safi haqqında elektron məlumat yerlşdirilməsi nəzərdə tutulub.

Məlumat üçün bildirək ki, əhalisi 250.000 nəfər olan Bəyoğlu rayonunda 25-ə yaxın konsulluq və çox sayda məşhur mədəniyyət mərkəzləri fəaliyyət göstərməkdədir. Gün ərzində rayondakı turist sayının fəallığı təxminən 2 milyonadəkdir. Məlumat lövhəsinin quraşdırıldığı ərazi İstanbulda erməni əsilli Türkiyə vətəndaşlarının ən çox yaşadığı rayonlardan biridir. İstiqlal prospektində quraşdırılan sözügedən məlumat lövhəsinin 100 metrliyində Rusiya Federasiyasının, 50 metrliyində isə Niderland Krallığı və Ekvador Respublikasının İstanbul şəhərindəki baş konsulluqları yerləşməkdədir. İstiqlal prospekti gün ərzində yüz minlərlə insan tərəfindən ziyarət edilir və İstanbul şəhərini turistik məqsədlə ziyarət edən əcnəbilərin ən sıx olduğu yerlərdən biridir. Fransız Mərkəzi və Fransa Respublikasının İstanbul şəhərindəki baş konsulluğu da məlumat lövhəsinin quraşdırıldığı prospektdə yerləşməkdədir.

MƏNBƏ:AZƏRTAC

BIR CAVAB BURAXIN

Rəyinizi daxil edin
Adınızı daxil edin