Azərbaycanlı rəssam Monteneqroda keçirilən beynəlxalq festivalda iştirak edib

Monteneqronun Podqoritsa şəhərində keçirilmiş “Oda to Life” incəsənət festivalında ölkəmizi Əməkdar rəssam Mehriban Əfəndi təmsil edib.

AZƏRTAC xəbər verir ki, Mehriban Əfəndini bu tədbirə “Oda to Life” festivalının təşkilat komitəsinin rəhbəri Miki Popoviç dəvət edib. Əməkdar rəssam özünün 5 əsərini (“Mirvari ulduz”, “İmpressiya”, “Buta”, “Sülhə aparan yol” və “Arzular”) təqdim edərək bu tədbirə qoşulub.

“Oda to Life” festivalı Monteneqroda bir neçə ildir ki, keçirilir. Bu il 20-dən çox ölkənin iştirak etdiyi festival bir neçə ölkənin turizm, mədəniyyət və təhsil nazirlikləri, çoxsaylı fondlar və incəsənət institutları tərəfindən dəstəklənib.

“Oda to Life” festivalı çərçivəsində Petroviç Zadəgan Sarayında keçirilmiş möhtəşəm sərgidə Fransa, İtaliya, İspaniya, Türkiyə, Ukrayna və digər ölkələrin tanınmış rəssam və heykəltəraşlarının işləri nümayiş etdirilib. Festivalda təmsil olunmuş ölkələrin incəsənət müəssisələrinin, mədəniyyət təşkilatlarının və səfirliklərinin nümayəndələri sərgidə iştirak ediblər.

Milanın La-Skala Teatrının məşhur triosu, britaniyalı aktyorlar, Sarayevonun “Cadeza” xorunun musiqiçiləri, incəsənətin müxtəlif sahələrini təmsil edən çoxsaylı qonaqlar bu festivala qoşulmaqla onu müxtəlif xalqları birləşdirən bayrama çeviriblər.

Qeyd edək ki, Mehriban Əfəndinin “Mirvari ulduz” əsərinin orijinalı geniş tamaşaçı kütləsinə ilk dəfə məhz bu festivalda təqdim edilib. Əsər ilk dəfə 2012-ci ildə Brodveydə “Art Takes times Squire” təşkilatı tərəfindən nümayiş etdirilib. Dünyanın bütün guşələrindən 100.000-dən çox rəssam və fotoqrafın iştirak etdiyi müsabiqədə 1000 ən yaxşı iş seçilib.

MƏNBƏ:AZƏRTAC

BIR CAVAB BURAXIN

Rəyinizi daxil edin
Adınızı daxil edin