Akademik Vahab Əliyev Azərbaycanda neft emalı elminin və istehsalatının ilk yaradıcılarındandır

Oktyabrın 9-da Bakıda Azərbaycan Milli Elmlər Akademiyasının (AMEA) və AMEA-nın akademik Y.Məmmədəliyev adına Neft-Kimya Prosesləri İnstitutunun (NKPİ) birgə təşkilatçılığı ilə görkəmli kimyaçı alim, texnika elmləri doktoru, Dövlət mükafatı laureatı, Əməkdar elm və texnika xadimi, akademik Vahab Əliyevin anadan olmasının 110 illik yubileyinə həsr olunan “Neft emalı və neft kimyasının innovativ inkişaf perspektivləri” mövzusunda beynəlxalq elmi-praktik konfrans işinə başlayıb.

AZƏRTAC xəbər verir ki, Neft-Kimya Prosesləri İnstitutunda təşkil olunan konfransda Rusiya, Ukrayna, Belarus, Misir və digər ölkələrdən alimlər iştirak ediblər.

İnstitutun direktoru, akademik Vaqif Abbasov bildirib ki, konfransın keçirilməsində əsas məqsəd görkəmli alimin neft kimyası və neft emalının inkişafındakı rolunu bir daha işıqlandırmaq, dünyada aparılan elmi tədqiqatların inteqrasiyası və müasir prioritetlərin müəyyənləşdirilməsidir. Qeyd edilib ki, V.Əliyev neft kimyası və neft xammalının emalı səhasində tanınmış görkəmli alim olmaqla, Azərbaycanda neft emalı elminin və istehsalatının ilk yaradıcılarındandır. İyirmi beş il NKPİ-na rəhbərlik etmiş alimin rəhbərliyi ilə “qaynar lay” texnologiyasının nəzəri əsasları işlənib hazırlanıb və bir çox kimyəvi proseslərə tətbiq edilib. Çıxış edənlər görkəmli alimin həyat və fəaliyyətindən söz açıblar.

Konfransda “Neft emalı və neft-kimyasının perspektiv istiqamətləri”, “Yaşıl kimya” və qaz kimyası”, “Neft kimyasında nanotexnologiyalar və perspektivli nanomateriallar”, “Oliqomerlər kimyasında innovativ sintezlər və texnologiyalar” bölmələri üzrə plenar, şifahi və stend məruzələr dinləniləcək.

MƏNBƏ:AZƏRTAC