A-dan Z-yə Göytürkcə kitabının təqdimat mərasimi baş tutub..

Artıq 5 ilə yaxındır fəaliyyət göstərən Türk Dünyası Kürşad Dərnəyi ötən gün iki ilə yaxındır üzərində işlənilən “A-dan Z-yə Göytürkcə“kitabının təqdimat mərasimini keçirmişdir.

Təqdimat mərasimi haqda ətraflı məlumat verməzdən öncə onu qeyd etmək istəyirik ki, TDKD yarandığı vaxtdan etibarən Göytürkcənin cəmiyyət tərəfindən mənimsənilməsinə çalışmışdır. Bu uzun müddət tədris edilən silsilə Göytürkcə dərslərində də təzahür etmişdir. Dərslər sayəsində 100-ə yaxın şəxs göytürk əlifbasını,fonetikasını,bir neçə söz və bu dillə bağlı digər nüansları öyrənmişdir.

Ötən ay isə TDKD cəmiyyətə yeni bir kitabın nəşr ediləcəyini duyurmuşdur. “A-dan Z-yə Göytürkcə“adlanan kitabımızda göytürkcə yazı şəklinin izahı,qrammatikası,Orxon-Yenisey yazılarından parçalar və göytürkcə lüğət mövcuddur.

17.02.2018-ci ildə TDKD bəhs etdiyimiz kitabın təqdimat mərasimini keçirərək cəmiyyətə yeni bir töhfəsini vermiş oldu.“Kitabevim.az“-da baş tutan təqdimat mərasimimizə cəmiyyətimizin ziyalıları (o cümlədən tarix üzrə elmlər doktoru,dosent İkram Ağasıyev, hüquq üzrə fəlsəfə doktoru,dosent,şair Xaliq Səfəvi), dəyərli soydaşlarımız və qonaqlarımız təşrif buyurmuşdular.

Dərnəyin başqanı və eyni zamanda “A-dan Z-yə Göytürkcə“kitabının redaktoru Toğrul Məmmədov ilk çıxış edərək göytürkcə dərsləri və kitabımız haqda ilkin məlumatı qonaqların nəzərinə çatdırmışdır.

Daha sonra kitabın müəllifi,TDKD-nin dostlarından biri Yavər İsmayılov kitab barədə ətraflı məlumat vermiş,kitabın içəriyindən bəhs edərək yazılma prosesini və lakonik məlumatları təqdimat iştirakçılarının nəzərinə çatdırmışdır.

Qeyd etdityimiz kimi təqdimat mərasimimizə dəyərli ziyalılarımız da təşrif buyurmuşdular ki,onlardan biri tarix üzrə elmlər doktoru,dosent İkram Ağasıyev idi. Fəaliyyətimizlə tanış olan dəyərli ziyalımız bizə dəyərli məsləhətlər verməklə yanaşı,müəyyən tarixi faktlar və nəzəriyyələr barədə də bizi maarifləndirmişdir.

Daha bir ziyalımız isə hüquq üzrə fəlsəfə doktoru,dosent,şair Xaliq Səfəvi idi.Xaliq bəy də öz çıxışında ideoloji məsələlərə toxunmuş və fəaliyyətimizdə uğurlar arzulamışdır.

TDKD üzvləri də öz çıxışları ilə təqdimat mərasiminə öz töhfələrini verməyi bacarmışdılar. İstedadlı gəncimiz, Turqut Məcidli öz bayatısını təqdim etmiş,göytürkcə ilə bağlı bir sıra bilgiləri iştirakçılarla bölüşmüşdür.

TDKD-nin digər üzvləri Hüseyn Məmmədli və Mustafa Namazlı isə “Sonuncu Əsr“ dərgisinin fəaliyyəti ilə bağlı müəyyən məlumatları qonaqların nəzərinə çatdırmışdır.

Təqdimatımıza təşrif buyuran qonaqlarımıza dərin təşəkkürümüzü bildirir və fəaliyyətimizin cəmiyyət üçün daha da faydalı olacağına ümid edirik.

 

 

BIR CAVAB BURAXIN

Rəyinizi daxil edin
Adınızı daxil edin