Əbədi yaramız – Şuşa

“Gələn il bu vaxt bu bayramı Şuşada, Qarabağda qeyd edək!” deyə-deyə 25 il oldu Şuşam.. Hər il sənə söz versək də, hələ də səni xilas edə bilməmişik. Sən yenə də özgələrin tapdağı altındasan.. Ölkəmin ən gözəl, cənnətəbənzər bölgəsi – Qarabağ, Şuşa.. Bəlkə də daha çox vəsf edə bilərdim səni.. Görsəydim.. Görmədən sevmək deyə bir şey var ki, onu sənin timsalında yaşayıram. Səni ancaq fotolardan, videolentlərdən görmək, öz diyarına ayaq basa bilməmək nə qədər çətinmiş.. Yaşıl çəmənlərinə qarışmış şəhid qanı hər il yaz gələndə baş qaldıran təbiətlə bərabər yeni həyat qazanır.. Alınmaz qala idin sən.. Amma.. Bağışlama bizi Şuşa.. Bağışlama.. Müharibənin amansızlığındanmı, ya xalqdakı çaşqınlıqdanmı bilmirəm nədən idi səni bu qədər tez təslim etməyimiz.. Bəlkə də müqavimət olsa idi səni qoruya bilərdik.. Ya da əksinə.. Nə qədər güclü müqavimət olsaydı belə bunun mənası olmayacaqdı və səni artıq bizdən çoxdan almışdılar.. Lakin, 2017-ci ildə deyilən bu sözlərin bir o qədər əhəmiyyəti yoxdur.. Lakin, yenə də bir ümid var qəlbimdə.. Nə vaxtsa sənə qovuşacağıq Şuşam.. Bəlkə bu il yox, amma bir gün mütləq..

Müəllif : Fəridə Həmidzadə